Учениците од ООУ „Александар Македонски“ учеа за авторските права

На 11.12.2020 година беше реализирана работилницата „Авторски права“, предвидена во рамките на Еразмус+ КА229 проектот „Млади новинари денес – одговорни дигитални граѓани утре“. Со цел остварување на планираната меѓуучилишна соработка со основно училиште на локално ниво, работилницата ја реализираше м-р Благица Ангеловска, библиотекар на нашето училиште, во текот на дополнителниот онлајн час за учениците од VII-2 одд. од ООУ „Александар Македонски“ – Скопје, по претходно заемен договор со нивниот одделенски раководител Александра Наџинска Ефремова.

​Целите на работилницата „Авторски права“ беа да се запознаат учесниците на работилницата со поимот авторски права, да научат дека и нематеријалното добро (на пр.: книжевно дело, уметничка слика, филм и сл.) е производ на нечиј труд којшто треба да му биде признаен и/или платен, како и за материјалното добро, да се предупредат дека појавите на плагијат и пиратерија како нелегални дејствија им нанесуваат штета на авторите и да им се посочат можностите за почитување на авторските права во секојдневните активности во училиштето, како и надвор од него. 

​По презентирањето на основните податоци и факти за постигнување на планираните цели, учениците добија задачи да го применат наученото и да го презентираат во текот на работилницата. Тие дадоа примери преку коишто ги наведоа потребните податоци за користење на печатени книжевни изданија и изданија во нивната електронска форма. Во развиената дискусија со учениците, им беа дадени насоки како во иднина да користат легални интернет сајтови за потребите на наставните содржини, како и за нивните секојдневни потреби.

Материјалите од работилницата можете да ги најдете на следниот линк

Автор: библиотекар Благица Ангеловска
Фото: screenshots од онлајн часот